Американската компанија „Амазон“ им нареди на своите вработени да се вратат во канцеларија сите пет дена во неделата, бидејќи се укинува политиката на хибридна работа.
Хибридната работа, која доживеа бум низ целиот свет по пандемијата на коронавирус, е прифатена како нов стандард во некои компании. Не во Амазон. Американскиот гигант во областа на онлајн продажбата им порачува на своите вработени дека ќе мора да работат во просториите на компанијата пет пати неделно бидејќи се укинува политиката на хибридна работа.
Промената ќе стапи на сила во јануари, изјави извршниот директор на Амазон Енди Џеси во меморандум до вработените.
„Решивме да се вратиме во канцеларија како што беше пред ковид“, рече Џеси, додавајќи дека тоа ќе им помогне на вработените „да бидат поиновативни, подобро поврзани и подобро да соработуваат“.
Енди Џеси долго време беше познат како скептик за работа од дома, но на вработените во Амазон претходно им беше дозволено да работат надвор од локацијата два дена во неделата.
Напорот на Амазон да ги врати вработените во канцелариите е извор на тензии во компанијата, која вработува повеќе од 1,5 милиони луѓе ширум светот.
Вработените во седиштето на компанијата во Сиетл одржаа протест минатата година бидејќи беа заострени правилата за целосна плата за работа од дома, кои беа воведени за време на пандемијата.
„Амазон“ го отпушти организаторот на протестот, што предизвика тврдења на т.н неправедна одмазда.
Во својата порака во понеделникот, главниот извршен директор на Амазон рече дека е загрижен поради тоа што компанијата, која долго време се гордее со зачувувањето на интензитетот на стартапи, иако оттогаш прерасна во технолошки гигант, гледа дека нејзината корпоративна култура е разредена со флексибилното работење и повеќе слоеви на бирократија.
Енди Џеси, кој го замени основачот Џеф Безос како извршен директор во 2021 година, рече дека создал „бирократско поштенско сандаче“ за вработените да можат да се жалат на непотребните правила и дека компанијата бара од менаџерите да се реорганизираат за да можат да надгледуваат повеќе луѓе.
Промени кои би можеле да доведат до намалување на бројот на работни места
Освен што ќе работат во канцеларија пет дена во неделата, вработените нема да имаат сопствено биро туку ќе седат на првото слободно, најавуваат во „Амазон“.
Компанијата соопшти дека вработен сè уште може да работи од дома во исклучителни околности, како што е болно дете или итен случај дома, како што беше случајот пред пандемијата. Но, освен во одобрен случај, се очекува луѓето да бидат во канцелариите.
Позицијата на менаџментот на Амазон е во спротивност со пристапот на Владата на Обединетото кралство, која вети дека флексибилното работење ќе биде стандардно од првиот ден, како дел од новото законодавство за правата за вработување што треба да биде објавено следниот месец.
Шефот на британската стопанска комора, Џонатан Рејнолдс, изјави за Тајмс дека има „вистински економски придобивки“ за луѓето кои работат од дома:
„Постои рамнотежа што треба да се постигне, но флексибилните работни аранжмани може да им помогнат на бизнисите да регрутираат од поширок фонд на луѓе.
Далечинското работење (од дома или која било друга локација) го достигна врвот на популарноста за време на пандемијата.
Многу компании почнаа да ги враќаат вработените во канцелариите во 2022 година, но враќањето не беше целосно. Од ова лето, околу 12 отсто од вработените со полно работно време во САД работат целосно од дома, а други 27 отсто велат дека имаат хибридна работна политика, покажа истражувањето.
Некои банки, како и одредени технолошки компании како Dell, побараа од своите вработени целосно да се вратат во канцеларијата оваа година.
