Управниот совет на Европската централна банка (ЕЦБ) денеска одлучи да ја намали каматната стапка на депозитите за 25 базични поени на 3,5 отсто.
Како што е наведено, ЕЦБ очекува стапката на инфлација во еврозоната да биде 2,5 отсто во 2024 година и да падне на 2,2 отсто во 2025 година и 1,9 отсто во 2026 година, што е исто како и во јунската прогноза.
Според прогнозата на ЕЦБ, основната стапка на инфлација ќе падне на 2,9 отсто оваа година, на 2,3 отсто во 2025 година и на два отсто во 2026 година.
„Условите за финансирање остануваат рестриктивни, а економската активност останува пригушена, како одраз на слабата приватна потрошувачка и инвестиции“, се вели во соопштението.
Европската централна банка очекува економски раст на еврозоната во 2024 година од 0,8 отсто и забрзување до 1,3 отсто во 2025 година и 1,5 отсто во 2026 година, што е нешто помалку од јунската прогноза.
Управниот совет на ЕЦБ не се обврзува однапред на конкретен курс на камати и неговата понатамошна монетарна политика ќе зависи од добиените податоци, се додава во соопштението.
Каматните стапки на главните операции за рефинансирање се намалени на 3,65 отсто, а каматната стапка на маргиналните кредитни капацитети ќе биде 3,9 отсто.
