Слабата кинеска побарувачка го потисна глобалниот пазар на челик, но воената економија на Владимир Путин ја направи Русија впечатлив исклучок.
Инвазијата на Кремљ на Украина ја поттикна руската економија, вклучувајќи ја и изградбата на станови и трошоците за инфраструктура. Ова и дава поттик на челичната индустрија во земјата, додека пазарите во Европа и во САД се притиснати од поплава од извоз од Кина, земјата која е и најголем потрошувач и производител, пишува „Bloomberg“.
Рускиот челик поскапе оваа година бидејќи побарувачката во првата половина од годината исто така се зголеми. Во меѓувреме, „ArcelorMittal SA“, најголемиот светски производител на челик надвор од Кина, изјави претходно овој месец дека глобалниот пазар е неодржлив бидејќи цените во Европа и САД се под маргиналните трошоци на производителите.
Руската економија и нејзините најголеми производители на челик, од кои повеќето се исто така под западни санкции, се релативно изолирани од каприците на меѓународните трговски текови. Додека профитот на „ArcelorMittal“ падна во првото полугодие, профитот на руските производители на челик како „Северстал“ и металуршкиот комбинат Магнитогорск порасна.
„Рускиот пазар на челик повеќе не е силно поврзан со глобалниот пазар, поради што неговата реакција на ситуацијата на надворешниот пазар е пригушена“, коментираше портпаролот на „Северстал“, кој е под контрола на милијардерот Алексеј Мордашов.
Локалната градежна индустрија е главниот двигател на растот, откако забележа раст од 3% оваа година, според „Северстал“. Само во првите шест месеци од годината во Москва беа завршени околу 2 милиони квадратни метри станови, како и бројни патишта. Локалната самоуправа планира да започне и со 12 нови подземни метро станици и да ја заврши изградбата на Националниот вселенски центар.
Изолацијата на Русија стана сила за челичната индустрија, која е главно затворена за западните пазари. Додека домашните цени пораснаа, светскиот репер за арматурата што се користи во градежништвото падна на повеќегодишното ниско ниво.
„Северстал“ објави пораст од 6% на заработката пред камата, данок и амортизација за првата половина од годината, бидејќи приходите на компанијата се зголемија за повеќе од една петтина. Сличен профит пријавува и металуршкиот комбинат Магнитогорск, уште еден санкциониран производител.
Единствениот голем руски производител на челик кој не е санкциониран од САД или од Европската унија – Новолипетски металуршки комбинат – е најмногу изложен на слабоста на глобалниот пазар бидејќи сè уште продава во Европа, според „BCS“.
Се разбира, поширокиот руски сектор за челик не е имун на светските трендови, а земјата се соочи со притисок да ги подмири плаќањата со Кина и другите трговски партнери бидејќи САД ги прошири секундарните санкции против банките во странство. Повисоките каматни стапки исто така би можеле да ја разладат економијата.
