Цените на нафтата на светскиот пазар денеска паднаа поради намалувањето на тензиите на Блискиот Исток, откако Израел го прифати предлогот за премостување на разликите што го блокираа договорот за прекин на огнот во Појасот Газа и поради економското забавување во Кина што влијаеше падот на побарувачката за гориво.
Во Лондон цената на суровата нафта „брент“ од Северното Море е пониска за 27 центи или 0,4 отсто и сега изнесува 77,39 долари за барел.
Во Њујорк цената на лесната сурова нафта падна за 21 цент или 0,3 отсто, на 74,16 долари за барел, пишува Ројтерс.
-Очекувавме немирно тргување бидејќи сè укажува дека напорите за прекин на огнот во Газа добиваат доволно поддршка за да може да се постигне договор – изјавија пазарните аналитичари од компанијата „Ритербуш и соработници“.
