Google се најде на удар на критики откако беше откриено дека извршиле притисок врз инфлуенсерите кои се дел од нивната програма Team Pixel, а на кои им испратиле нови модели од нивните паметни телефони. Како и другите компании, Google генерално им испраќа нови телефони на новинари и инфлуенсери за рецензија и, се разбира, тие се слободни да пишуваат што сакаат, односно според правилата на професијата треба да напишат објективен впечаток за прегледаниот производ.
Team Pixel е специјална програма која нема никаква врска со рецензии од професионални новинари, но во рамките на оваа програма Google ги испраќа своите уреди до инфлуенсерите (само оние кои добиваат специјална покана да бидат дел од Team Pixel) и креаторите на содржини за да тие можат да ги користат овие уреди за да фотографираат, снимаат видеа и други содржини што ќе бидат објавени на интернет. Тие се еден вид амбасадори на брендови кои ги добиваат телефоните по презентацијата, но пред да излезат во продажба, каде во своите објави треба да ги стават хаштаговите #teampixel или #giftfromgoogle.
Креаторите на содржини кои беа дел од оваа програма се чини дека досега немаа никакви обврски кон Google и користењето на нивните телефони, но со уредите од серијата Pixel 9, тоа се промени. Така, членовите на оваа програма добија нов договор од Google, односно услови за работа според кои се очекува да ги користат Pixel уредите на Google во своите објави наместо конкурентни уреди. За оние кои нема да ги почитуваат новите услови, од Google велат дека соработката помеѓу креаторот на содржината и брендот ќе биде прекината.
Оваа објава непријатно ги изненади учесниците на програмата на Google, а дел од нив ја објавија содржината на новите услови за соработка на социјалните мрежи, додека некои најавија дека во знак на протест ја напуштаат програмата на Google.
Како што обично се случува, кога ваквите работи кои создаваат негативна перцепција за брендот почнуваат да се шират на интернет, компаниите се принудени да реагираат и да ги променат своите одлуки. Така беше и овој пат, а Google им призна на новинарите на The Verge дека направиле грешка и ги повлекле новите правила. Тие уште еднаш нагласија дека програмата Team Pixel не е поврзана со новинари и рецензенти, за да не се добие впечаток дека ги уценуваат рецензентите. На ваквата состојба реагираа дел од технолошките медиуми и рецензенти кои истакнаа дека не се дел од споменатата програма и својата работа ја вршат професионално и без надворешни влијанија врз евалуацијата и резултатот од прегледот.
