Кинеската влада денеска објави дека поднела жалба до Светската трговска организација (СТО) поради царините воведени од Европската унија за електричните автомобили произведени во Кина.
Министерството за трговија соопшти дека Кина прибегнала кон механизмот за решавање спорови на СТО „за да ги заштити развојните права и интереси на индустријата за електрични возила и соработката за глобална зелена трансформација“, пренесува Бета.
ЕУ воведе привремени царини до 37,6 отсто за електричните возила произведени во Кина и го оправда својот потег со фактот дека тие компании неправедно имаат корист од државните субвенции.
Кина вели дека нејзината државна поддршка за индустријата за електрични возила е во согласност со правилата на СТО.
Двете страни имаат рок до почетокот на ноември да се обидат да ги решат разликите, по што привремените тарифи стануваат официјални.
Кинескиот извоз на автомобили се зголеми во јули во споредба со истиот месец минатата година, додека домашната продажба падна, објави денеска индустриската асоцијација.
Кинеското Министерство за трговија рече дека царините на ЕУ ги прекршуваат правилата на СТО и ја поткопуваат глобалната соработка за климатските промени.
Како одговор, Кина започна истраги за извозот на француски коњак и европско свинско месо, за кои некои аналитичари стравуваат дека може да прерасне во економски штетна трговска војна со ЕУ.
