Се очекува Франција да ја доживее својата најлоша жетва на мека пченица во последните 40 години поради прекумерните дождови, објави „Bloomberg“.
Производството во најголемиот производител на пченица во Европската унија би можело да падне на 25,2 милиони тони во сезоната 2024-2025 година, 27 отсто под петгодишниот просек, според „Argus“.
Непрестајните дождови, заедно со недостатокот на сончева светлина и ниските температури кои ги фаворизираат болестите на земјоделските култури, влијаеја на приносот и квалитетот на земјоделските култури во повеќето области на растење.
Екстремните временски услови на Стариот континент ги погодија житариците оваа сезона, со обилни дождови во северозападна Европа, а сушата и високите температури ги оштетија посевите на пченката на исток. Минатата недела француските земјоделци ја повикаа владата да обезбеди финансиска помош поради катастрофалната жетва.
„Мораме да се вратиме во 1983-та година и тогашните 24,5 милиони тони за да видиме кога последен пат имало толку лоша жетва во Франција. Целата француска индустрија за жито мора да ги сноси последиците од овој историски пад на производството“, рече Готје ле Молгат, директор на „Argus Media France“.
И покрај лошата перспектива во Франција и поограничениот род во Русија, пченицата со која се тргуваше во Чикаго сè уште беше блиску до најниското ниво во последните четири години бидејќи американскиот род го одржуваше пазарот добро снабден. Во мај, пченицата со која се тргува во Париз го достигна највисокото ниво во повеќе од една година бидејќи мразот и дождот ја намалија понудата, но цените оттогаш постојано паѓаат.
