Инфлацијата во Швајцарија остана стабилна во јули, што ги зајакнува очекувањата за дополнително намалување на каматните стапки од страна на централната банка на земјата, објави „Bloomberg“.
Потрошувачките цени се зголемија за 1,3 отсто во однос на претходната година, објави во петокот заводот за статистика. Податоците беа во согласност со проценките на економистите и под прогнозата на швајцарската национална банка за инфлација од 1,5% за целиот трет квартал од годината.
Цените за аранжмани за одмор, авионски патувања и облека паднаа, додека трошењето за хотели и овошје и зеленчук е зголемено. Главниот показател, без свежите и сезонските производи, како и енергетските носачи, остана непроменет – 1,1%.
Швајцарската централна банка почна да ја ублажува монетарната политика порано од другите водечки финансиски институции во светот и ги намали трошоците за задолжување на двата нејзини состаноци оваа година. Се очекува да се преземе трет таков потег на следниот состанок во септември.
Централните банкари на земјата прогнозираат раст на потрошувачките цени – поттикнат главно од домашните услуги – во просек од 1,5% во третиот квартал. Потоа се очекува да забави и да достигне 1% во 2026-та година.
Швајцарија има една од најниските стапки на инфлација во Европа. Податоците од соседната еврозона покажаа дека растот на цените таму е малку забрзан до 2,6% на годишно ниво во јули. Врз основа на Хармонизираниот индекс на Европската унија, Швајцарија забележа раст на цените од 1,2% за периодот.
