Доналд Трамп им вети на илјадници обожаватели на биткоин дека како претседател ќе ја направи Америка „биткоин суперсила во светот“, добивајќи широка поддршка на пазарот кој се чувствува загрозен од регулаторното внимание. „Мојата работа ќе биде да ве ослободам“, рече Трамп.
Со ентузијастички про-крипто говор, поранешниот американски претседател и кандидат на претстојните ноемвриски избори се обиде да ги продлабочи своите врски со индустријата која е уморна од перцепираниот прогон од страна на администрацијата на Бајден и е подготвена да потроши многу за да обезбеди попријателска публика во Вашингтон, известува Фајненшл Тајмс.
Коментарите на Трамп на годишната конференција за биткоин во Нешвил, прва за претседателски кандидат на една голема партија, означија пресврт за човекот кој пред само три години го критикуваше биткоинот како „измама“ што му се закануваше на американскиот долар.
Позитивниот ефект од изјавата на Трамп му помогна на биткоинот да достигне највисоко ниво за шест недели во понеделникот, накратко достигна 70.000 долари, блиску до неговиот историски максимум од нешто повеќе од 73.000 долари.
Крипто пазарот се соочи со „брутален напад“ од актуелната американска администрација и Комисијата за хартии од вредност (SEC), соопшти фирмата за ризичен капитал Andreessen Horowitz, која се претставува како најголем крипто-инвеститор во светот.
Други големи донатори на Трамп, вклучително и извршниот директор на Cantor Fitzgerald, им се придружија на присутните во Нешвил, заедно со поддржувачите кои носеа црвени капи „Make Bitcoin Great Again“. Во исто време, на конференцијата во Нешвил Cybertruck кој го промовираше биткоин кружеше околу конференцијата.
Кампањата на Трамп за прифаќање криптовалути трае веќе неколку месеци. Тој рече дека неговата кампања добила повеќе од 25 милиони долари во крипто донации. Неговиот партнер Џеј-Ди Венс поседува 250.000 долари во биткоин.
