Во срцето на Скопје, меѓу живописните улици и плоштади, уличните продавачи со своите шарени тезги го обогатуваат градскиот пејзаж, нудејќи разновиден асортиман од крофни, пуканки, освежителни цедени сокови, рачно изработен накит…
Овие мали претприемачи, кои со својата креативност и труд придонесуваат за уникатниот дух на градот, принудени се да плаќаат паушален данок на личен доход.
Елена, 30-годишна уметница која со љубов и прецизност создава накит, е една од многуте кои ја засегнува оваа промена.
Таа, која своите дела ги продава на локации каде што се собираат странски туристи, изразува подготвеност да го прифати новиот даночен систем, но со услов постапката да биде значително поедноставена.
„Не е проблемот во плаќањето данок“, вели таа. „Проблемот е во бирократската мака која мораме да ја поминеме за секоја продажба“.
Елена објаснува дека моменталниот систем бара од неа да поднесува посебно барање за секое излегување на улица, да чека одобрение на шалтери и да плаќа за секој ден посебно, што значително ја отежнува нејзината способност да остане конкурентна и да го одржи својот бизнис жив.
„Доколку можеше да се воведе годишен паушален данок, тоа би ни овозможило да се фокусираме на креативноста и продажбата, наместо на папирологијата“, додава таа.
Овој предлог за даночна реформа предизвика мешани чувства меѓу уличните продавачи, но сите се согласуваат дека потребни се промени кои ќе ги олеснат административните процедури и ќе им овозможат да продолжат да го разубавуваат градот со своите производи и услуги.
Инаку, оваа тема стана актуелна откако Маре Данкова, виш даночен референт во регионалната подружница во Штип на УЈП, вчера истакна дека на транспарентен начин УЈП ги информира даночните обврзници оти е време посериозно да си ја сфатат обврската со плаќање паушален данок.
„Знаеме дека се случуваат многу настани, манифестации, концерти во летниот период, а и сведоци сме дека среќаваме продавачи на пуканки, крофни, сладоледи, кафиња и цедени сокови на тие настани. Ние сме должни, како УЈП, да ги информираме сите лица што се занимаваат со дејност од повремен карактер, дека имаат обврска да достават барање до УЈП, каде што се одвива дејноста, за паушално плаќање на данокот на личен доход“, изјави Данкова.
Таа посочува дека секој граѓанин, пред започнувањето со работа од времен карактер, е должен да го достави барањето во УЈП, каде што ќе биде обработено и ќе се утврди данок во Одделението за утврдување данок, по што се добива и решение од времен карактер.
Данкова истакна дека се пополнува барањето на лесен и едноставен начин, со наведување на матичниот број, адресата на живеење и со штиклирање за работа од времен карактер.
„Доколку, во текот на годината, во различни периоди, лицето извршува повеќе вакви дејности, треба да достави одделни барања за секој период. По доставувањето на барањето и добивањето на решението, даночниот обврзник има обврска и да го плати утврдениот данок“, вели Данкова.
При посета на ваквите продавачи, доколку немаат поднесено барање, инспекторите на УЈП изготвуваат службени белешки и ги доставуваат до Трудовата инспекција.
Б.З.М.
