Францускиот азурен брег е најпосакуваното место за втор дом во светот, според индексот на врвни домови на консултантската компанија „Savills“. Во првите пет се и Монако, ски-центарот Аспен, Тоскана и Мајорка.
Сент Мориц, Котсволдс, Коста Брава, Палм Бич и Коста Смералда се понатаму во првите десет.
„Беа анализирани 60 локации ширум светот врз основа на цените на луксузните недвижнини, проценката на квалитетот на животот на секоја локација, гостопримството и глобалниот досег и поврзаноста на секоја локација преку воздушни врски“, рече Луси Ханус, маркетинг менаџер во „Savills“.
„Како и при изборот на прв дом, важи принципот „локација, локација, локација““, додава таа.
Француската ривиера (Азурниот брег), која е на врвот на рангирањето, нуди прекрасна глетка, разновидни опции за луксузен начин на живот, годишни меѓународни настани од спортски турнири до филмски фестивали, надополнети со широк спектар на имоти што се нудат.
Второпласираниот Монако има највисоки цени на луксузни куќи од сите 60 локации во индексот. Ова, заедно со добрата поврзаност и лесен пристап преку аеродромот во Ница и преполниот календар на социјални и спортски настани – од годишни гала вечери до трка во Формула 1 – ја поткрепуваат позицијата на кнежеството.
На третото место е Аспен, највисоко рангираниот ски-центар во индексот и една од најбараните дестинации за втор дом во САД. Четвртото и петтото место се соодветно за централниот италијански регион Тоскана, каде цените на луксузните недвижности се релативно ниски, и Балеарскиот остров Мајорка.
Највисоко рангирана локација во Обединетото Кралство во индексот е Котсвудс, на седмото место, која привлекува купувачи од втор дом со својата извонредна природна убавина и широк спектар на атракции и лесен пристап до Лондон.
Дестинациите со највисоки цени и најбрз раст обично се ограничени по површина или имаат ограничувања на бројот на имоти што можат да се градат. Скијачките локации се издвојуваат во овој поглед, при што просечниот раст на цените таму достигна 15% помеѓу јуни 2022-ра и јуни 2023-та година.
Во следните години, островите, микродржавите и целосно изградените области веројатно ќе продолжат да бележат раст на цените на куќите бидејќи побарувачката од главните купувачи се зголемува, предвидува консултантската куќа.
Растот поврзан со пандемијата на глобалните пазари на недвижности, особено на пазарите за втор дом, веќе е видлив и на луксузните локации за втор дом. Вредноста на капиталот на пазарите за втор дом се зголеми во просек за 7% минатата година, што покажува дека луѓето продолжуваат да им даваат приоритет на домот по заклучувањето поради Ковид-19, напиша „Savills“.
На долг рок, консултантската компанија очекува да забележи промена во навиките за забава. Во Шведска, загриженоста на еколозите за влијанието на воздушниот сообраќај доведе до зголемени критики на патниците со авион. Швеѓаните традиционално го поминуваат својот одмор блиску до дома, со многу втори домови лоцирани во областите околу Стокхолм. Ако движењето против воздушниот сообраќај добие замав во други земји, веројатно ќе имаат корист локациите за одмор со добри железнички врски во близина на главните центри за создавање богатство, смета компанијата.
