Директорката на Тајната служба Кимберли Читл поднесе оставка откако се соочи со незадоволство и од републиканците и од демократите поради начинот на кој Тајната служба се справи со обидот за атентат врз поранешниот американски претседател и републикански претседателски кандидат Доналд Трамп.
Нејзината оставка ја потврди американскиот претседател Џо Бајден. Тој најави дека наскоро ќе именува нов шеф на службата.
Читл поднесе оставка еден ден по катастрофалниот настап пред Комисијата за надзор на Претставничкиот дом. Двете страни главно неуспешно бараа одговори на прашањата дали нејзината агенција соодветно го заштитила Трамп пред обидот за атентат.
На сослушувањето, кое траеше речиси шест часа, Читл ја презеде одговорноста за безбедносните пропусти и призна дека инцидентот го означи „најзначајниот оперативен неуспех на Тајната служба во последните децении“.
Но, пратениците од двете партии изразија фрустрација поради нејзината неможност да одговори на многу прашања во врска со пукањето во кое беше ранет Трамп, еден од присутните на неговиот митинг во Батлер, Пенсилванија беше убиен, а двајца други беа ранети.
На крајот од сослушувањето, највисокиот демократ на комисијата му се придружи на републиканскиот претседател во повикот за оставка на Читл.
Тајната служба, која е одговорна за заштита на сегашните и поранешните претседатели на САД, се соочува со криза откако вооружен маж успеа да го застрела Трамп од покривот на митинг на отворено во Батлер, Пенсилванија на 13 јули. Службата е под истрага од повеќе конгресни комисии и е под внатрешен надзор на американското Министерство за домашна безбедност.
Куршум го повреди десното уво на Трамп, републиканскиот претседателски кандидат, а еден учесник на митингот бил убиен во престрелката. Вооружениот напаѓач, идентификуван како 20-годишниот Томас Крукс, на крајот беше убиен од снајперист на Тајната служба. Бајден, кој се откажа од трката за уште еден мандат, повика и на независен преглед.
Голем дел од критиките се фокусираа на необезбедувањето на покривот на индустриската зграда каде напаѓачот лежеше на околу 140 метри од бината каде што зборуваше Трамп.
