Кина истражува дали низата акции на Европската унија (ЕУ) против светската економија број 2 претставуваат нелегална бариера за слободната трговија, пишува „Bloomberg“.
Кинеското Министерство за трговија вели дека постапката ќе опфати низа сектори, вклучувајќи железнички транспорт, соларна и ветерна енергија и безбедносна опрема. Тоа се области кои ЕУ ги таргетираше во последниве месеци со сет на нови алатки за кои Брисел вели дека се дизајнирани да ја заштитат економијата на ЕУ од нефер практики на Пекинг.
Доколку Кина утврди дека мерките на ЕУ се незаконски, кинеските власти можат да одржат билатерални разговори, да иницираат мултилатерално решение и да преземат „други соодветни мерки“, според правилата на истрагата. Во посебен документ, Министерството рече дека чекорите може да вклучуваат препорака за воведување „одмазднички мерки“.
Портпаролот на Европската комисија (ЕК) не одговори веднаш на барањето за коментар.
Односите меѓу Пекинг и Брисел достигнаа ново најниско ниво во последниве месеци, бидејќи блокот ја приближува својата политика кон Кина до онаа на САД. Американските и европските лидери го критикуваа Пекинг дека ги преплави нивните пазари со евтин извоз и изразија загриженост за зајакнување на економската безбедност.
Во центарот на тензијата е кинескиот извоз на електрични автомобили, за кои Европа се грижи дека ги загрозува работните места во сопствениот автомобилски сектор. Блокот воведе привремени давачки до 37,6 отсто за извоз на некои автомобили од Кина, откако американскиот претседател Џо Бајден објави нова царина од 100 отсто.
ЕУ, исто така, истражува испораки на медицински помагала од Кина според нова алатка за гаранција за реципроцитет и користи нови правила против субвенционирање за да нападне кинеска фирма за безбедносна опрема за која вели дека користела субвенции за да го наруши пазарот.
Кина, која смета дека акциите на ЕУ го прекршуваат принципот на слободна трговија, одговори со истраги за француската ракија и шпанското свинско месо, како и со закани против други индустрии, вклучително и авијацијата, каде Франција е ранлива.
Големата истрага во Пекинг треба да биде завршена до 10 јануари, со можно продолжување до средината на април, се вели во соопштението на Министерството за трговија на земјата. Инспекцијата започна по барање на Кинеската стопанска комора за увоз и извоз на машини и електронски производи, додаваат од секторот.
ЕУ и Кина ќе преговараат за тарифите, иако амбасадорот на ЕУ во Пекинг вели дека земјата неодамна одговорила на инсистирањето на блокот за разговори.
