Инфлацијата во Германија забави во јуни за првпат по два месеци, потврдувајќи ја претпоставката на Европската централна банка (ЕЦБ) дека неодамнешниот пораст на ценовните притисоци е привремен скок, откако минатиот месец ЕЦБ ги намали каматните стапки за прв пат од 2019 година.
Потрошувачките цени се зголемија за 2,5 отсто на годишно ниво, во споредба со 2,8 отсто во мај, покажуваат податоците на ЕУ објавени од германскиот завод за статистика, објави Фајненшл тајмс.
Стапката на инфлација беше помала од 2,6 отсто што ги очекуваа економистите анкетирани од Ројтерс. Цените на енергијата паднаа за 2,1 отсто во однос на јуни минатата година, но инфлацијата на цените на храната повторно се зголеми, достигнувајќи 1,1 отсто на годишно ниво, по 0,6 отсто во мај. Инфлацијата кај услугите остана висока и стабилна на 3,9 отсто, непроменета во однос на мај.
Благиот пад на инфлацијата во Германија во јуни остава можност за ново намалување на каматните стапки на ЕЦБ во септември, иако инфлацијата останува на малку повисоко ниво. Штотуку објавената прелиминарна проценка на инфлацијата во Германија за јуни укажува на одредено ублажување на инфлаторните притисоци, што ја отвора вратата за натамошно намалување на каматните стапки од страна на Европската централна банка.
Новите податоци за германската инфлација не само што го илустрираат тековното влијание на базните ефекти и минатите владини мерки врз тековната инфлација, туку нагласуваат дека инфлацијата останува постојано над целните два проценти. Судејќи според достапните податоци од регионалните земји, инфлацијата на стоки, транспорт и енергија е намалена. Во исто време, инфлацијата на услугите останува на покачено ниво.
