Акциите на „Airbus“ паднаа во вторникот, откако најголемиот светски производител на авиони беше принуден да ја намали прогнозата за профитот за целата година поради продлабочувањето на прекините во синџирот на снабдување и предизвиците во неговиот вселенски бизнис.
Главниот извршен директор Гијом Фаури им рече на аналитичарите дека недостигот на мотори повторно ги нарушува производствените планови на компанијата.
„Моторите, кои не беа проблем во 2023-та година и почетокот на 2024-та година, повторно стануваат значаен проблем. Ова е нова ситуација која не ја очекувавме“, коментира Фаури.
Деловите за кабината исто така се во недостиг бидејќи многу авиокомпании ги обновуваат постарите авиони со оглед на предизвикот да обезбедат нови, додаде тој.
Предупредувањето го потресе поширокиот воздушно-вселенски сектор, при што акциите на производителот на мотори „Rolls-Royce“ и „Melrose Industries“ исто така паднаа на седницата.
Како резултат на прекинот во синџирите на снабдување, „Airbus“ соопшти дека ќе испорача „околу 770“ авиони оваа година, што е помалку од претходната цел од „околу 800“. Производителот на авиони, исто така, ја намали својата цел да произведува 75 авиони месечно од својот најпродаван модел „А320“ од 2026-та до 2027-ма година.
Во изминатите две години, „Airbus“ мораше да се справи со ограничувањата на синџирот на снабдување што ги нарушија плановите на компанијата да го зголеми производството за да ја задоволи зголемената побарувачка од авиокомпаниите по пандемијата.
Ова е втор пат од 2022-ра година кога „Airbus“ ја намалува својата годишна цел за испорака. Фаури на состанокот за авијација во Берлин претходно овој месец изјави дека очекува ограничувањата на синџирите на снабдување во индустријата да траат уште две до три години.
Компанијата ќе ги објави резултатите од првото полугодие на 30-ти јули. Исто така, рече дека ќе биде потребна загуба од околу 900 милиони евра во првите шест месеци од годината поврзани со нејзиниот бизнис со вселенски системи.
„Airbus“, кој има воздухопловни и одбранбени бизниси, очекува прилагодена заработка пред камати и даноци од 5,5 милијарди евра оваа година, под претходната прогноза од 7 милијарди евра.
Предупредувањето дојде кога „Airbus“ се приближува до договор со „Spirit AeroSystems“ за преземање на активностите што добавувачот со седиште во САД ги прави за некои од неговите програми, особено за авионите „А220“ и „А350“.
Договорот ќе го отвори патот за „Boeing“ да го преземе поголемиот дел од „Spirit“, вклучително и неговите операции во Канзас.
