Соларната енергија во Германија поставува нов производствен рекорд бидејќи обновливите извори на енергија (ОИЕ) заземаат сè поголем дел од енергетскиот микс на земјата, пишува „Bloomberg“.
Производството на соларна енергија достигна 47.198 мегавати напладне по берлинско време, покажуваат податоците на Европската енергетска берза АГ. Се очекува генерирањето на тој вид енергија да порасне за 34% ова лето во споредба со истиот период во 2023-та година, проценува „BloombergNEF“.
Ова значи дека рекордот на Германија, веќе лидер во Европа во производството на обновлива енергија, наскоро повторно ќе биде соборен бидејќи земјата додава повеќе капацитет.
Сончевото време низ Европа го зголемува производството на енергија од неодамна проширените соларни паркови, поместувајќи го природниот гас и другите горива што се користат за производство на електрична енергија. Ова предизвикува цените да паднат околу средината на денот бидејќи мрежата не може да го апсорбира целото производство, но цените остануваат високи во други периоди од денот кога земјата се потпира на гас.
Цените на струјата со која се тргува во сегментот Ден напред паднаа на 75,60 евра за мегават час.
Во среда се очекува просечната температура во Берлин да се искачи до 26 Целзиусови степени, што е за 8 степени над просекот во последните 30 години. Ова ја зголемува побарувачката за електрична енергија од клима уредите, помагајќи да се апсорбира зголеменото соларно производство.
