Германскиот институт „Ifo“ малку ја зголеми својата прогноза за економски раст на најголемата европска економија за 2024-та година, наведувајќи ја посилната куповна моќ на потрошувачите, закрепнувањето на глобалната трговија со стоки и индустриското производство во втората половина.
„Ifo“ ја зголеми својата прогноза за раст на 0,4% од 0,2% во март, генерално во согласност со пролетната прогноза на германската влада за раст од 0,3%.
„Се појавува нова надеж. Германската економија полека излегува од кризата. Втората половина на 2024-та година треба да биде значително подобра од првата“, коментира економистот на „Ifo“, Тимо Волмершаусер.
Германија, која минатата година има најслаби резултати меѓу главните економии во еврозоната, се очекува да добие одреден импулс во своето закрепнување како што одминува годината, при што се предвидува забавување на инфлацијата и зголемување на номиналните плати.
„Како што одминува годината, куповната моќ на приватните домаќинства треба да продолжи да добива на сила и целокупното економско закрепнување треба да се забрза како што се нормализира потрошувачката економија“, коментира Волмершаусер.
Светската трговија со стоки и глобалното индустриско производство треба да продолжат да закрепнуваат од втората половина на годината, поддржани од постепеното зголемување на инвестициите додека монетарната политика во индустријализираните земји се олеснува, додаваат од „Ifo“.
Институтот ја задржа својата прогноза за економски раст на 1,5% во 2025-та година, а инфлацијата се очекува да забави на 2,2% оваа година од 5,9% минатата година и на 1,7% во 2025-та година.
