Југоисточна Азија е регион особено подготвен да се приклучи на БРИКС, група која е противтежа на меѓународните институции предводени од Западот.
Малезискиот премиер Анвар Ибрахим пред посетата на неговиот кинески колега Ли Чианг рече дека Малезија сака да се приклучи на блокот, кој оваа година се удвои во големина со приливот на земји од глобалниот југ и кој нуди политичка платформа ослободена од влијанието на Вашингтон, пишува „Bloomberg“.
Тајланд – американски сојузник – минатиот месец објави дека сака да се приклучи на БРИКС, група именувана по нејзините основачи: Бразил, Русија, Индија, Кина и Јужна Африка. Блокот „претставува рамка за соработка Југ-Југ, во која Тајланд долго сакаше да биде дел“, рече министерката за надворешни работи Марис Сангиампонса за новинарите минатата недела.
Сето ова е сигнал за растечка фрустрација од меѓународниот поредок предводен од САД и клучните институции кои остануваат цврсто под контрола на западните сили, како што се Светската банка и Меѓународниот монетарен фонд.
– Некои од нас, вклучително и луѓе како мене, мислат дека мораме да најдеме решенија за неправедната меѓународна финансиска и економска архитектура, изјави за „Bloomberg“ поранешниот министер за надворешни работи на Малезија, Саифудин Абдула. „БРИКС веројатно би бил еден од начините за балансирање на некои работи“.
Блокот, кој со години се состоеше од само пет членки, се прошири на девет со вклучување на Саудиска Арабија, Иран, Обединетите Арапски Емирати, Етиопија и Египет овој јануари. Ова во голема мера беше резултат на кинеската дипломатија и зајакнувањето на угледот и влијанието на Пекинг на глобалната сцена.
Друга нација од Југоисточна Азија, Индонезија, беше прв фаворит за приклучување минатата година само за претседателот Џоко Видодо да сигнализира дека нема да избрзува со одлуката.
Сепак, БРИКС продолжува да биде од интерес за земјите од таканаречениот Глобален Југ, и покрај напорите на САД и Европа да ги спречат земјите да соработуваат со Москва, овој месец се појавија претставници на 12 земји кои не се членки на групата на министерскиот совет на БРИКС во Русија. Меѓу нив беа долгогодишните американски непријатели како Куба и Венецуела, но и земји како Турција, Лаос, Бангладеш, Шри Ланка и Казахстан.
Присутен беше и Виетнам, кој минатата година ги подобри врските со Вашингтон и сега го прими рускиот претседател Владимир Путин. „Виетнам е секогаш подготвен да учествува и активно да придонесува за глобалните и регионалните мултилатерални механизми“, рече портпаролот на Министерството за надворешни работи Фам Ту Ханг.
„Bloomberg“ се обиде да го минимизира политичкото значење на БРИКС, наведувајќи дека блокот има резерва од 100 милијарди долари во странска валута и дека оваа резерва може да се користи за заеми еден на друг во кризни ситуации.
Групацијата ја основа и Новата развојна банка, која одобри заеми во износ од 33 милијарди долари, главно за изградба на водоводи, патишта и други инфраструктурни проекти, што, арогантно наведува агенцијата, одговара на посиромашните земји кои „кубурат“ за средства.
