Најголемиот соларен парк во светот е пуштен во употреба во Кина, со објект што може да напојува мала земја со годишен капацитет од над 6 милијарди киловат часови, пишува „Independent“.
Паркот, кој се наоѓа во пустинска област во северозападната провинција Ксинџијанг, се простира на 809 милиони квадратни метри, приближно колку Њујорк.
Комплексот од 5 гигавати (GW), кој беше поврзан со кинеската мрежа во понеделникот (3-ти јуни), е доволно моќен да ги задоволи потребите за електрична енергија на земја со големина на Луксембург или Папуа Нова Гвинеја.
Кина е водечка во светот во однос на распоредувањето на соларна енергија, зголемувајќи го својот капацитет во 2023-та година за повеќе од 50%.
Новиот соларен парк ги претекнува сличните проекти како што се „Ningxia Teneggeli“ и „Golmud Wutumeiren“, исто така лоцирани на кинеска територија, за да стане најголемиот соларен објект во светот.
Неодамнешниот извештај на Меѓународната агенција за енергија (ИЕА) ја опиша желбата на Кина да ја прошири својата индустрија за обновливи извори на енергија (ОИЕ) како „извонредна“, при што земјата лани пушти во употреба толку нов соларен капацитет колку што остатокот од светот успеа да инсталира во 2022-ра година.
„Кина претставува речиси 60 отсто од новиот капацитет за обновлива енергија што се очекува да стане оперативен на глобално ниво до 2028-ма година“, се вели во извештајот на ИЕА.
„Улогата на Кина е клучна за постигнување на глобалната цел за тројно зголемување на обновливите извори на енергија, бидејќи се очекува земјата да инсталира повеќе од половина од новиот капацитет потребен на глобално ниво до 2030-та година. На крајот од периодот на предвидување, речиси половина од електричната енергија во Кина ќе дојде од обновливи извори“, додава ИЕА.
Анализата на водечкиот производител „Longi Green Energy Technology“ во 2023-та година процени дека инсталирањето соларни панели на покривите на куќите и другите згради во Кина ќе произведе доволно електрична енергија за напојување на сите домаќинства во Кина и Југоисточна Азија заедно.
Масовното зголемување на кинеското производство на соларни панели предизвика неодамнешна загриженост дека прекумерниот капацитет може да доведе до трговски тензии како резултат на презаситеноста на глобалниот пазар.
Минатиот месец, во обид да го спречи тоа, американскиот претседател Џо Бајден објави дека царините за увоз на кинески соларни ќелии ќе се удвојат од 25% на 50%.
