Инфлацијата врз основа на приватната потрошувачка (PCE) во САД во април достигна 2,7 отсто, што е исто како и во март, објави денеска американското Министерство за трговија.
Податоците се во согласност со очекувањата на пазарот, пренесуваат странските агенции. Американската централна банка (ФЕД) најмногу го зема предвид овој индикатор за инфлација во својата монетарна политика.
Поскапувањето во април најмногу се должи на поскапувањето на услугите кое порасна за 3,9 отсто. Стоките поскапеле само за 0,1 отсто, храната за 1,3 отсто, а енергијата за три отсто.
На месечно ниво, инфлацијата достигна 0,3 отсто, што е иста како и во март.
Без цените на храната и енергијата, базичната инфлација според индикаторот PCE во април достигна 2,8 отсто на годишна основа, а на месечно ниво 0,2 отсто. И тоа беше во согласност со очекувањата и ја претставува истата динамика како и претходниот месец.
Како што јави француската новинска агенција АФП, денешното соопштение на Банката на федерални резерви, чија цел е среднорочна цел на инфлација од два отсто, најверојатно ќе ја поттикне да ги задржи високите каматни стапки во текот на летото. Централните банкари, предводени од претседателот на ФЕД, Џером Пауел, веќе неколку недели навестуваат дека каматната стапка ќе остане непроменета некое време.
Во меѓувреме, аналитичарите, особено берзанските инвеститори и американскиот претседател Џо Бајден, се надеваат дека банката би можела да започне циклус на намалување на каматните стапки веќе во текот на летото.
