Американската министерка за финансии Џенет Јелен изјави во четвртокот дека сака пазарните економии да подигнат „ѕид на противење“ на Кина поради нејзината индустриска политика предводена од државата, клучна тема што таа ја турка на овонеделниот состанок на министрите за финансии на Г7.
Јелен, исто така, рече дека бара „општ договор за концептот“ од министрите за финансии и гувернерите на централните банки на земјите од Г7 за план за зголемување на приходите од околу 300 милијарди американски долари замрзнати руски средства, што би можело да и обезбеди на Украина значителна финансиска поддршка по 2025 година, пренесува Ројтерс.
Овие две теми се очекува да доминираат на состанокот на министрите за финансии и гувернерите на централните банки во петок и сабота во Стреса, северна Италија. Јелен рече дека многу земји надвор од напредните индустриски демократии на Г7 се загрижени поради преголемото инвестирање на Кина во електрични возила, соларни производи, полупроводници, челик и други стратешки индустрии, вклучувајќи ги Мексико, Индија и Јужна Африка.
Без промени во кинеската политика, вклучително и промена од зголемување на производството кон зајакнување на домашната побарувачка, според американската министерка, пазарните економии се соочуваат со поплава од евтин кинески извоз што ќе ја загрози одржливоста на нивните производители.
Јелен рече дека не бара од другите земји да ги копираат американските царини или тесно да ги координираат одговорите на нивната трговска политика. „Но, ние мора да застанеме заедно и да испратиме обединета порака до Кина. Да се разбере дека не само една земја се чувствува така, туку дека се соочува со ѕид на противење на стратегијата што ја спроведуваат“, рече таа.
Јелен, исто така, посочи дека, доколку министрите на Г7 можат да се договорат за концептот за подобрување на приходите од замрзнатите руски фондови, деталите би можеле да бидат договорени до јунскиот самит на лидерите на Г7 во Пуља. Според неа, иако се разговарало за 50 милијарди долари, не биле донесени одлуки за големината на потенцијалниот заем за Украина, кој би бил поддржан со приходи од околу 3,5 милијарди долари од замрзнати руски средства.
