Јапонската економија се намали посилно од очекуваното во првиот квартал бидејќи слабиот јен продолжи да ги оптоварува потрошувачите. Ова создава нов предизвик за зголемување на клучните каматни стапки дури и над нулата.
Прелиминарните податоци за бруто домашниот производ (БДП) објавени во четвртокот покажаа дека јапонската економија се намали за 2,0 отсто на годишна основа во периодот јануари-март во однос на претходниот квартал.
Надолно ревидираните бројки покажуваат речиси никакво движење на БДП во четвртиот квартал од 2023-та година, бидејќи прогнозите за капиталните трошоци се намалени.
Додека прелиминарните бројки за капиталните трошоци често се предмет на тешки ревизии во последното објавување, севкупниот пад на сите компоненти на БДП сугерира дека на јапонската економија и недостасуваше главен мотор за раст во првиот квартал.
Тоа може да создаде извесно двоумење за централната банка, која ги зголеми стапките во март за прв пат од 2007-ма година и оттогаш ја сигнализира својата намера да продолжи со затегнување.
„Тајмингот на зголемувањето на стапката може да биде одложен во зависност од тоа како БДП може да закрепне во тековниот квартал“, рече Јошимаса Марујама, главен пазарен економист во „SMBC Nikko Securities“.
Според него, иако економијата сигурно ќе закрепне во тековниот квартал поради растот на платите, останува неизвесноста околу потрошувачката во услужниот сектор.
Последните податоци покажаа пад на БДП-то на квартална основа од 0,5% наспроти 0,4% што ги очекуваа економистите. Ревидираните податоци за првиот квартал ќе бидат објавени на 10-ти јуни.
Слабиот јен создаде економија со две брзини во Јапонија, при што извозот и туристичкиот сектор генерално имаат корист од поконкурентниот девизен курс, но домаќинствата и малите бизниси се притиснати од надуените цени на увезените стоки.
