„Ericsson“ соопшти дека очекува неговите приходи од продажба да се стабилизираат во втората половина на 2024-та година, поради знаците дека некои клиенти се подготвени повторно да трошат.
Во исто време, производителот на телекомуникациска опрема успеа да ги надмине очекувањата за својот профит во првиот квартал, поддржан од еднократен настан.
Шведската групација ги наведе неодамна добиените договори и нормализирањето на нивото на залихи на своите клиенти во Северна Америка како причини за своите добри перформанси.
Цената на акциите на компанијата се зголеми за 6% наутро до нивото кое последен пат го достигна на почетокот на месецот.
Сепак, „Ericsson“ очекува пазарот на „5G“ радио пристапна мрежа (RAN) да продолжи да се намалува барем до крајот на годината.
„Сè уште има неизвесност на пазарот, а ние се обидуваме да го истакнеме и тоа“, коментира главниот финансиски директор Ларс Сандстром.
Производителите на телекомуникациска опрема како „Ericsson“ и ривалската „Nokia“ се погодени од пад на трошоците на нивните клиенти за 5G, со оглед на повисоките каматни стапки и несигурната економска перспектива.
Оперативниот профит на „Ericsson“, без трошоците за реструктуирање, неочекувано се зголеми на 4,3 милијарди круни (394 милиони долари) во првиот квартал од 4 милијарди круни една година порано, и покрај падот на приходите од продажба за 15 отсто. Аналитичарите анкетирани од „LSEG“ дадоа просечна прогноза за пад на профитот до 1,7 милијарди круни.
Добивката го вклучува еднократниот ефект од 1,9 милијарди круни поврзан со решавање на трговски спор.
Во јануари, „Ericsson“ предвиде дека пазарите надвор од Кина ќе продолжат да слабеат оваа година и најави натамошни кратења на работни места во март, по намалувањето на трошоците и кратењето на илјадници работни места во 2023-та година, бидејќи продажбата забави по години голема побарувачка за 5G опрема.
„Ќе има повеќе (кратење)“, коментира Сандстром, додавајќи дека „голем дел“ од годишните трошоци за реструктуирање на „Ericsson“ од 3-4 милијарди круни ќе бидат поврзани со намалувањето на работната сила.
Компанијата предвиде бруто маржа, без трошоците за реструктуирање на поделбата на мрежата, од 42-44% за вториот квартал. Во првиот квартал показателот достигна 44,3%.
„Во втората половина од годината, нашите маржи ќе бидат поддржани од подобрениот бизнис микс“, додава тој.
Аналитичарите на „Jefferies“, кои препорачуваат купување на акции на „Ericsson“, рекоа дека бруто-маржата од 42,7% е далеку над очекувањата, поддржана од мрежниот сегмент.
