Под слоганот „Планета против пластика“ денеска се одбележува Денот на планетата Земја. Целта е да се сврти вниманието на здравствените ризици предизвикани од загадувањето со платика, но и на штетата што пластиката ја нанесува на животната средина. Посебен акцент е ставен на заштитата на бебињата, кои се најмногу изложени на штетното влијание на микропластиката.
Годишно се произведуваат 380 милиони тони пластика. Само во последните 10 години е произведена повеќе пластика отколку во целиот 20 век.
Непрофитната организација која се занимава со Денот на планетата Земја, Earthday.org, покрена петиција со која ги повикува Обединетите нации и владините организации да усвојат глобален договор за пластика што ќе ги обврзе сите на исти стандарди и да го намалат производството на пластика за најмалку 60 проценти до 2040 година.
Барањата го вклучуваат и принципот дека производителот плаќа, што значи дека производителите и продавачите на пластика би биле одговорни за спречување на штетата на животната средина или здравјето, како и за надоместување на истата.
Тие се залагаат и најдоцна до 2030 година целосно да се укине производството на пластика за еднократна употреба.
Брзата мода е еден од најголемите извори на микропластика
Еден од најголемите извори на микропластика е брзата мода. Таа индустрија произведува над 100 милијарди облеки годишно. Луѓето сега купуваат 60 отсто повеќе облека отколку пред 15 години, а секоја облека во просек се користи за половина повеќе време.
Според оваа организација, 85 отсто од облеката завршува на депонии или печки за согорување, а само еден отсто се рециклира.
Исто така, социјалната нееднаквост и брзата мода се директно испреплетени, поради експлоатативните работни услови, ниските плати и раширениот детски труд.
Споменатата организација повикува на инвестирање во иновативни технологии и материјали за да се изгради иднина без пластика.
Пластиката се распаѓа на микропластика (честички до пет милиметри во дијаметар) и нанопластика (до еден микрометар), со што се ослободуваат токсични хемикалии кои завршуваат во храната што ја јадеме, водата што ја пиеме и воздухот што го дишеме. Нанопластиката може да влезе во крвотокот, а истражувањата го докажаа нејзиното присуство во срцето, белите дробови и мозокот на животните и луѓето.
Бебињата се најмногу изложени на штетното влијание на микропластиката
Бебињата се најмногу изложени на здравствени ризици предизвикани од микропластиката, како и од пластичните адитиви. Дури и мала доза на микропластика или адитиви има поголемо влијание врз телото на бебињата од возрасните.
Активностите како гризење и лазење ја зголемуваат веројатноста микропластиката да влезе во телото на детето. Бебињата ставаат шишиња, играчки и други предмети во устата. Исто така, микропластиката може да се најде во прашина или материјали на подот и може да ги вдишува бебето.
Негативното влијание на микропластиката врз бебињата вклучува потенцијални ефекти врз невролошкиот развој, имунолошкиот систем и другите витални функции, хормонални нарушувања и дигестивни проблеми, како што се иритација на цревата и намалена апсорпција на хранливи материи.
Изложеноста на микропластика може да му наштети на репродуктивното здравје на бебињата подоцна во животот, вклучително и можни проблеми со плодноста и репродуктивните органи.
Некои истражувачи сугерираат дека микропластиката има последици по менталното здравје на бебињата, што укажува на можна поврзаност со нарушувања како што се нарушување на хиперактивноста со дефицит на внимание (АДХД) и аутизам.
Уште позагрижувачки е тоа што бебињата се изложени на микропластика и слични хемиски адитиви уште пред раѓањето. Во неодамнешното истражување, микропластиката е пронајдена во плацентата и во мајчиното млеко.
