Нови проекти за терминали за ЛНГ се очекуваат во Европската унија од следната година и наскоро би можело да има изобилство на пазарот. Ова значително ќе ги намали цените, изјави претседателката на Европската комисија Урсула фон дер Лајен на прес-конференција по завршувањето на дводневниот вонреден состанок на Европскиот совет.
Таа истакна дека денешните високи цени се пречка за европската конкурентност, особено во производството на метал, стакло и ѓубрива.
„Во ЕУ не само што мораме да користиме дигитални услуги и производи, туку да бидеме водечка сила во светот на ова поле“, инсистираше Фон дер Лајен.
Според неа, на инвеститорите во ЕУ им е потребна предвидливост.
„Ни треба легална миграција. Минатата година 3,5 милиони странци пристигнаа во ЕУ легално, поканети од работодавците – тоа е три пати повеќе од бројот на мигранти кои дошле илегално“, рече Фон дер Лајен.
По повод дискутираниот извештај за европската конкурентност, претседателот на Европскиот совет, Шарл Мишел, посочи дека е неопходно да се воведе унифициран пристап кон прашањето на банкротите во ЕУ.
„Треба да ги приближиме условите за работа на компаниите, да ги поттикнеме инвестициите и пристапот до финансии“, додаде тој.