Што е следно за биткоинот, голем пад или рушење на рекорд? Истражувањето откри интересно размислување

Тргувањето со криптовалути има добри и лоши времиња. На пример 2022 година беше обележана со постојан пад на вредноста на биткоинот и другите криптовалути, а инвеститорите со неверување гледаа како нивната инвестиција се топи и исчезнува со голема брзина. Од друга страна, по тој голем пад, следуваше позитивен период, а во последно време биткоинот повторно држи висока цена и руши рекорди. Многумина очекуваат дека оваа вредност ќе продолжи да расте (особено како што се приближува преполовувањето), се споменуваат бројки од 100.000 долари, но прашање е колку долго биткоинот ќе расте, или кога ќе започне нов пад.

Deutsche Bank неодамна спроведе истражување за иднината и движењето на цената на биткоинот на примерок од околу 3.600 луѓе во САД, а резултатите од тоа истражување се доста интересни. Имено, околу една третина од анкетираните веруваат дека биткоинот би можел да го дочека крајот на годината со вредност помала од 20 илјади долари, што би претставувало радикален пад во однос на сегашната вредност. Иако ова е значителен примерок кој не верува во иднината на биткоинот, треба да се нагласи дека овој процент се намалува во однос на претходните месеци, а во јануари 36 отсто од луѓето верувале дека биткоинот може да ја заврши годината со вредност помала од 20 илјади долари, додека во февруари тој удел изнесуваше 35 отсто. Во последното истражување, кое беше спроведено во март, овој удел падна на 33 отсто.

Иако порано често можевме да читаме дека криптовалутите се измама, според ова истражување, уделот на луѓе кои мислат така е само 1 процент. Што се однесува до големите оптимисти кои веруваат дека биткоинот повторно би можел да го собори рекордот и да достигне вредност од 75 илјади долари, ги има само 10 отсто. Сепак, бројот на оние кои веруваат дека крипто ќе биде важен облик на инвестирање и начин на плаќање во иднина се зголемува – додека во септември минатата година тој удел беше помалку од 40 проценти, сега се искачи на 52 проценти.

Имајќи предвид дека се ближи преполовувањето, при што профитот за рударите е намален за половина, а кој секогаш е придружен со големо зголемување на вредноста на биткоинот, за очекување е барем во блиска иднина оваа криптовалута да продолжи да расте. Но, како и секогаш кога станува збор за крипто, треба да се нагласи дека не постојат строги правила кои ќе гарантираат раст, а финансиските експерти секогаш предупредуваат на нестабилноста на криптовалутите, кои можат да изгубат голем дел од нивната вредност за кратко време.

Затоа, кога тргувате и донесувате инвестициски одлуки, секогаш треба да бидете многу внимателни и, како што советуваат многу експерти од финансиската индустрија, да инвестирате само пари што можете да си дозволите да ги изгубите.