Во март, испораките на течен природен гас во Азија достигнаа рекордни 24 милиони тони за овој период од годината, што е за 12% повеќе отколку во март минатата година, покажуваат податоците на „Kpler“, цитирани од „Bloomberg“.
Намалувањето на цената на суровината во последните месеци повторно ја врати желбата на економиите во развој да користат природен гас.
За време на месеците од енергетската криза 2022-2023 година, повеќето азиски земји се префрлија на алтернативен јаглен бидејќи цената на природниот гас достигна рекордни височини.
Сега побарувачката за гас е обновена и најголем интерес има во Индија, Кина и Тајланд, покажуваат и податоците. Увозот на гас во Индија се зголеми за 30% на годишно ниво, а во Кина – за 22%. Постојаното снабдување и благата зима во Азија ги доведоа цените на гасот на најниско ниво во последните три години.
И во Европа цената е стабилизирана и од почетокот на годината договорите трајно останаа под нивото од 30 евра за мегават час. На 28-ми март, последната седница на ТТФ пред велигденските празници на запад, природниот гас се тргуваше за нешто повеќе од 27 евра за мегават час.
Испораките на течен гас во Европа се намалија за 20% во март. Една од причините е рекордното производство на електрична енергија од офшор ветерни електрани во Западна Европа, што сериозно ја ограничи потребата од гас за производство на електрична енергија.
Европа почна да купува големи количини течен природен гас по почетокот на војната во Украина. Земјите од ЕУ потоа решија да ја намалат зависноста од руските испораки на природен гас и го зголемија увозот на гас од Норвешка, како и течен природен гас од САД и Катар. Истовремено, се зголемија и инвестициите во постројки за обновливи извори на енергија – во последните години во енергетските мрежи во заедницата се додадени рекорден број нови зелени капацитети.
