Минималната плата во Грција ќе се зголеми од 780 евра бруто на 830 евра бруто од 1 април – најави во петокот премиерот Киријакос Мицотакис.
Во март 2023 година минималната плата веќе е зголемена за 9,4 отсто.
Инфлацијата во Грција се врати на 4,3 отсто во 2023 година, според податоците на Европската комисија, откако надмина девет отсто во 2022 година.
„Кога дојдовме на власт во 2019 година, минималната плата беше 650 евра. Тоа претставува зголемување од околу 27 отсто“, потсети Мицотакис и рече дека неговата цел е „во 2027 година просечната плата во Грција да биде 1.500 евра, а минималната 950 евра“.
Последното зголемување е четврто за помалку од пет години – изјави во четвртокот владиниот портпарол Павлос Маринакис: од 2019 година просечната плата во Грција се зголеми од 1.046 евра на 1.251 евро.
И покрај зголемувањето, платите во Грција се ниски во споредба со другите земји од ЕУ, главно поради нивниот пад за време на финансиската криза 2009-2018 година и строгите мерки за штедење наметнати од кредиторите – ЕУ и ММФ.
Намалена за 22 отсто за време на кризата, минималната плата прво беше зголемена за 11 отсто од претходната левичарска влада на Алексис Ципрас (2015-2019).
Според податоците на Евростат, во 2023 година просечната часовна цена на трудот, вклучувајќи ги и придонесите за социјално осигурување, во еврозоната изнесувала просечно 35,6 евра бруто, а во Грција 15,7 евра.
