Голем дел од родителите во Македонија се соочуваат со значително зголемување на трошоците за организација на детски родендени во игротеки.
Според најновите информации, цените за услугите во детските игротеки значително се зголемени, достигнувајќи суми до 500 евра за само два и пол часа прослава.
Родителите на 3-годишно дете од Скопје споделија дека направиле детална пресметка пред да одлучат дали е поисплатливо да го прослават роденденот на своето дете во игротека или дома.
„По деталната пресметка, заклучивме дека домашната забава е три пати поевтина од прославата во игротека. Иако атмосферата во игротеките е незаменлива, финансиската страна на прашањето е многу важна за нас“, ни изјави 32-годишната Андријана Николовска од Влае.
Според извештаите, минатата година цената за два и пол часа прослава во игротека изнесувала околу 300 евра, вклучувајќи простор, храна и пијалаци.
Оваа година, само изнајмувањето на просторот чини многу повеќе. Дополнително, цените за торта, балони и фотографски услуги не се вклучени во основната цена и бараат дополнителен буџет.
Сопственикот на една популарна игротека во населбата Карпош за Денар изјави дека зголемувањето на цените за услугите во неговата игротека е директно поврзано со порастот на трошоците за одржување и работење.
„Секако дека не ни е во интерес да ги зголемуваме цените, но со оглед на зголемените трошоци за енергија, храна и други оперативни расходи, немаме друг избор. Нашата цел е да обезбедиме квалитетна услуга и безбедно окружење за децата, и тоа бара инвестиции“, изјави тој.
Со оваа изјава, сопственикот на игротеката само го потврдува општото мислење дека скапотијата во земјата има значително влијание на цените на услугите, вклучувајќи ги и оние во игротеките.
Ваквата ситуација создава притисок врз родителите, кои често се ограничени со сопствениот простор и се принудени да изберат игротеки за прослава на родендените на своите деца. Сепак, многумина сега размислуваат за алтернативни опции поради зголемените трошоци.
Б.З.М.
