21 јули, 2024
ПочетнаЕКОНОМИЈАПретстојниот состанок на ФЕД во фокусот на инвеститорите

Претстојниот состанок на ФЕД во фокусот на инвеститорите

Оваа недела е клучна за Wall Street, бидејќи вниманието на пазарот е фокусирано на состанокот на Комитетот за отворен пазар на ФЕД (FOMC) на 19-20 март. Сигналите на претседателот на ФЕД Џером Пауел за идните намалувања на каматните стапки ќе бидат во центарот на вниманието.

Минатонеделните податоци за цените на потрошувачите и производителите во САД ја зголемија загриженоста на инвеститорите дека инфлацијата може да биде поотпорна од очекуваното. Ова може да биде аргумент за продолжување на рестриктивната политика на американската централна банка, односно за нејзино помало олабавување оваа година, оценува Deutsche Bank, пренесува CNBC.

Федералните резерви ќе бидат принудени да ги одржуваат високите каматни стапки подолго отколку што предвидуваат пазарите и банкарите, според академските економисти анкетирани од Фајненшл тајмс. Повеќе од две третини од анкетираните рекоа дека ФЕД нема да направи повеќе од две намалувања оваа година, бидејќи сè уште треба да се грижи за инфлацијата.

Мнозинството од испитаниците очекуваат првото намалување на каматните стапки оваа година да се случи меѓу јули и септември. Трговците на финансиските пазари очекуваат најмалку три намалувања на каматните стапки оваа година, почнувајќи од јуни. Тековната прогноза на ФЕД, која треба да се ажурира во среда, исто така повикува на три намалувања во 2024 година.

Економистите очекуваат ФЕД во среда да одлучи да ги задржи каматните стапки на сегашните 5,25 до 5,50 отсто, што е највисоко ниво во последните 23 години. Тие очекуваат и последната фаза на инфлација да биде доста тешка. Тоа би ја разочарало администрацијата на Вашингтон, која сака трошоците за задолжување да се намалат што е можно поскоро.

Американскиот претседател Џо Бајден се обиде да го намали притисокот врз купувачите на станови преку даночни кредити наведени во неговото неодамнешно обраќање за состојбата на нацијата, но бенефитот веројатно нема да има толку големо влијание како намалувањето на каматните стапки.

Овогодинешните американски извештаи за инфлацијата беа полоши од очекуваното и ја вратија постојаната инфлација на прв план, но тоа не ги намали добивките на берзите. Референтниот индекс S&P 500 минатата недела достигна историски максимум, а од почетокот на годината зајакна за 7,3 отсто. Технолошкиот индекс Nasdaq Composite годинава е зголемен во вредност за 6,4 отсто, а индустрискиот Dow Jones за 2,7 отсто.

Цените на златото паднаа во азиското тргување во понеделникот, губејќи го клучното ниво на поддршка бидејќи трговците се внимателни со средствата кои не даваат принос пред какви било дополнителни сигнали за каматните стапки на состанокот на FOMC, пренесува Investing.

Инвеститорите исто така ќе сакаат да знаат дали ФЕД ќе продолжи да смета на три намалувања на каматните стапки оваа година. Извршниот директор на JP Morgan Chase, Џејми Дајмон, неодамна оцени дека кредибилитетот на ФЕД е во прашање и дека треба да почекаме до јуни за да се разјаснат работите.

НАЈНОВИ ВЕСТИ

ХОРОСКОП