Проблемите со запек може да се појават поради неколку причини, но недоволното внесување на влакна е блиску до врвот на листата.
Најдобриот дневен внес на растителни влакна е помеѓу 28 и 34 грама, а најлесен начин да го зголемите внесот на влакна во организмот е да ја промените исхраната.
Диететичарката Ерика Барера истакна една храна за која тврди дека е најдобра во решавањето на проблемот со запек.
Храната која се издвојува е овесната каша, која многу луѓе сакаат да ја јадат за појадок.
Познато е дека влакната се добри за организмот и дека помагаат при проблеми со запек, а во овесната каша има дури два вида влакна: растворливи и нерастворливи.
Диететичарката Ерика Барера објаснува дека „нерастворливите влакна се крупни влакна кои го стимулираат лачењето на вода и слуз во цревата, што дава лаксативно дејство, додека растворливите влакна создаваат гел и имаат висок капацитет за задржување вода, што ја зголемува и омекнува столицата во дебелото црево и го олеснува празнењето“.
Токму затоа многу експерти препорачуваат да се јаде овесна каша за појадок со цел веднаш да се влијае на здравото функционирање на цревата. Покрај здравствените придобивки, овесната каша е и многу вкусна и може да се комбинира со овошје или разни јаткасти плодови.
Една чаша овесна каша има осум грама влакна, пренесува „Eating Well“.
Ако сакате поздрав цревен микробиом, јадењето повеќе влакна е еден од најдобрите начини да го направите тоа. Овесната каша содржи добар извор на влакна, особено бета-глукан, кој има здравствени придобивки.
„Бета-глуканот ферментира во цревата и создава разновидност на бактерии, што може да помогне во подобрување на цревниот микробиом со намалување на воспалителните својства и зајакнување на имунитетот“, објаснува Барера.
