Јапонската економија избегна техничка рецесија, иако растот на бруто домашниот производ (БДП) во последниот квартал на 2023-та година беше послаб од очекуваното и ја зголеми загриженоста за бавното економско закрепнување, покажаа ревидираните владини податоци.
Годишната стапка на промена на јапонскиот БДП беше ревидирана на зголемување од 0,4% во периодот октомври-декември во однос на претходниот квартал, додека првичната проценка беше за намалување од 0,4%.
Сепак, порастот беше послаб отколку што прогнозираа економистите во анкетата на „Reuters“ за пораст од 1,1%. На квартална основа, БДП-то се зголеми за 0,1%, во споредба со првично пријавениот пад од 0,1% и просечната прогноза за пораст од 0,3%.
„Ревизијата е нагорна, но домашната побарувачка останува неубедлива, особено во потрошувачката“, рече Саисуке Сакаи, виш економист во „Mizuho Research and Technologies“.
Во срцето на нагорната ревизија се капиталните трошоци, кои се зголемија за 2,0% на квартална основа. Податоците беа подобри од прелиминарната проценка за пад од 0,1%, но останаа под просечната пазарна прогноза за пораст од 2,5%.
Приватната потрошувачка, која сочинува околу 60 отсто од јапонската економија, падна за 0,3 отсто во периодот октомври-декември, нешто послабо од првичните проценки за пад од 0,2 отсто.
Ревизијата доаѓа во време на растечките пазарни очекувања дека Банката на Јапонија би можела да се откаже од негативните каматни стапки уште овој месец, делумно поттикната од неодамнешните коментари на членовите на управниот совет дека земјата се движи кон целта на регулаторот за инфлација од 2%.
И покрај некои слабости откриени од податоците, централната банка најверојатно ќе се оддалечи од негативните каматни стапки до следниот месец, наведувајќи ја зголемената перспектива за големи зголемувања на платите за време на годишните разговори за платите со синдикатите, предвиде Марсел Тилијант, шеф на Одделот Азија-Пацифик во „Capital Economics“.
Банката на Јапонија треба да одржи дводневен состанок за да ја утврди својата монетарна политика на 18-19 март.
Минатата недела, во Јапонија, моментално четврта по големина економија во светот по Германија, реалните плати прилагодени на инфлацијата се намалија во јануари 22-ри месец по ред, а годишната потрошувачка на домаќинствата забележа најголем пад во истиот месец од 35 месеци.
Странската побарувачка придонесе за 0,2 процентни поени во реалниот БДП, непроменет од прелиминарните податоци.
