Управниот совет во четвртокот одлучи да ги задржи трите клучни каматни стапки на Европската централна банка (ЕЦБ) непроменети. Од последниот состанок на Управниот совет во јануари, инфлацијата дополнително опадна, соопшти ЕЦБ.
Во најновите проекции на ЕЦБ, инфлацијата е ревидирана надолу во 2024 година, што во голема мера ги одразува пониските цени на енергијата. ЕЦБ сега прогнозира дека инфлацијата во тековната година во просек ќе биде 2,3 отсто и следната година 2,0, додека прогнозата за 2026 година е 1,9 отсто. Надолно се ревидирани и проекциите за базичната инфлација.
Очекувана беше одлуката на ЕЦБ да ги задржи каматните стапки непроменети и да го одложи нивното намалување за следните месеци, бидејќи инфлацијата продолжува да се намалува и покрај постојаните високи ценовни притисоци.
Откако се двоумеше да ги зголеми каматните стапки пред две години кога се разгоре инфлацијата, ЕЦБ сега се двоуми дали да прогласи победа над инфлацијата и да почне да ги намалува каматните стапки, според Ројтерс. Според очекувањата на аналитичарите, ЕЦБ ги задржа рекордните каматни стапки на 4,0, 4,5 и 4,75 отсто.
Креаторите на политиките на ЕЦБ не го променија својот став дека им требаат повеќе докази дека инфлацијата е под контрола и дека тековните зголемувања на платите нема повторно да ја поттикнат. Некои експерти со месеци велат дека ЕЦБ најверојатно нема да ги намали трошоците за задолжување пред состанокот на 6 јуни, бидејќи клучните податоци за платите ќе бидат достапни во мај.
ЕЦБ ќе одржи уште еден состанок на 11 април кога се очекува да објави кога би можело да се намалат каматните стапки.
