Биткоинот достигна 57.000 долари за прв пат од крајот на 2021 година, поддржан од побарувачката на инвеститорите преку фондовите со кои се тргува преку берза, како и понатамошните купувања на компанијата MicroStrategy.
Најтргуваната криптовалута во светот вчера додаде дури 4,4 отсто и достигна 57.039 долари пред да се корегира на околу 56.100 долари рано утринава. Цената на биткоинот се зголеми за 32 отсто од почетокот на годината, поттикнувајќи го растечкиот апетит на инвеститорите за помали токени, како што се етер или догекоин.
Нето 6,1 милијарда долари се влеаја во неколку ETF-ови за биткоин кои започнаа со тргување во САД на 11 јануари, сигнализирајќи ја зголемената побарувачка за биткоин во овој нов трговски канал, пишува Блумберг. Планираното намалување на понудата на биткоин само го зголемува оптимистичкото расположение во однос на неговиот раст на цената.
MicroStrategy, компанија за бизнис софтвер, купува биткоин на големо како дел од својата корпоративна стратегија. Во понеделникот објави дека купила уште околу 3.000 токени овој месец, а сега поседува околу 10 милијарди долари во биткоини.
„Не очекуваме големо повлекување на биткоинот со оглед на неговиот пробив и позитивниот среднорочен моментум“, напиша Кејти Стоктон, основач на Fairlead Strategies.
Комбинираната вредност на дигиталните средства сега е приближно 2,2 трилиони долари, според CoinGecko, во споредба со ниското ниво од околу 820 милијарди долари за време на мечкиниот пазар во 2022 година кога пропаднаа FTX и некои други крипто платформи, но сепак помалку од врвот што беше забележан на приближно три трилиони долари една година порано.
