Со новиот закон за нефер трговски практики, кој се очекува наскоро да биде доставен до Собранието, треба да се воспостави ред и рамноправност меѓу производителите и трговците на прехранбени производи.
Законот предвидува максимална стапка на профит од 10 отсто за секој од актерите во синџирот на слободниот пазар, како и забрана на наметнување нефер услови од страна на купувачите со преговарачка моќ.
Производителите на земјоделски и прехранбени производи се жалат дека се во подредена состојба во однос на трговците, кои ги откупуваат нивните производи по ниски цени и ги препродаваат на пазарите со високи маржи.
Според последните податоци, трошоците на производство се вртоглави и производителите едвај успеваат да заработат 3 отсто, додека трговците имаат профит и до 30 отсто.
Од Министерството за економија брифираат дека законот е во согласност со европските стандарди и дека ќе донесе поголема конкурентност и транспарентност на пазарот.
Министерот за економија Крешник Бектеши неодамна истакна дека законот ќе го спречи искористувањето на производителите од страна на трговците.
– Инфлацијата од пред неколку месеци е под 5 отсто и вкупната инфлација во делот на храната и во пијалаците ќе биде во тренд на намалување и во континуитет. Веќе сме при крај со анализите. Веќе е подготвен законот за нефер трговски практики, добиено е мислење од релевантните институции, чекаме и мислење конкретно од Секретаријатот за законодавство, по што треба да се направат кореспондентни табели поради тоа што е со европско знаме за да оди така во Собрание – истакна тогаш Бектеши.
Тој додаде дека законот ќе ги заштити и потрошувачите, бидејќи ќе се спречи зголемување на цените на прехранбените производи и безалкохолните пијалаци, за кои се утврдени гарантирани цени.
Денар на оваа тема се консултираше и со економски експерти кои велат дека Законот за нефер трговски практики е потребен и е добредојден за да се заштитат интересите на производителите, потрошувачите и на државата.
„Со ограничувањето на рабатите и забраната на наметнување на нефер услови, се спречува злоупотреба на пазарната моќ и се воспоставува поеднаквост и конкурентност. Ова ќе доведе до подобрување на квалитетот и намалување на цените на прехранбените производи, што ќе има позитивен ефект врз животниот стандард и инфлацијата. Законот е во согласност со европските принципи и практики и ќе придонесе за поскоро интегрирање на нашата земја во Европската Унија“, коментираат економистите.
Законот предвидува и дека сите договори меѓу производителите и трговците мора да бидат писмени и регистрирани кај Комисијата за заштита од конкуренција. Законот ќе влезе во сила по објавувањето во „Службен весник“ и ќе има период на приспособување од шест месеци.
Б.З.М.
