Инфлацијата во Европската унија значително забрза во декември, по посилниот раст на цените во еврозоната, објави во средата Евростат.
На ниво на ЕУ, годишната стапка на инфлација, мерена преку хармонизираниот индекс на потрошувачки цени (HICP), кој овозможува споредба меѓу земјите-членки, во декември се зголеми на 3,4 отсто, од 3,1 отсто во претходниот месец.
На месечна основа, цените благо пораснаа, за 0,1 отсто, откако во ноември беа намалени за 0,4 отсто, покажуваат табелите на Европскиот завод за статистика.
Во декември, годишната стапка на инфлација во еврозоната измерена со ХИЦП изнесуваше 2,9 отсто, забрзувајќи за првпат од април, ја потврди Евростат проценката објавена на почетокот на јануари. Во ноември таа изнесуваше 2,4 отсто.
Цената на свежата храна најмногу порасна во декември во еврозоната, за 6,8 отсто во однос на истиот месец од претходната година, значително повеќе отколку во ноември.
На месечна основа, цените во 20-члената економија во декември пораснаа за 0,2 отсто, откако во ноември паднаа за прв пат од јули за 0,6 отсто.
Меѓу земјите на ЕУ кои не се дел од еврозоната, Чешка и Романија имаа убедливо највисоки стапки на инфлација, од 7,6 и седум проценти, соодветно. Во Полска, водечката економија надвор од еврозоната, таа изнесуваше 6,2 отсто.
Кај земјите од еврозоната, цените најмногу пораснале во Словачка, за 6,6 отсто во однос на декември претходната година. Следува Австрија со пораст на потрошувачките цени од 5,7 отсто.
Блиску е и Хрватска, каде цените според ХИЦП се повисоки за 5,4 отсто во однос на декември 2022 година, кога годишната стапка на инфлација изнесуваше 12,7 отсто. Во ноември минатата година таа изнесуваше 5,5 отсто.
На месечно ниво, потрошувачките цени во Хрватска во декември се за 0,3 отсто пониски во однос на ноември, кога се намалени за 0,4 отсто во однос на претходниот месец.
Најблиску до Хрватска на крајот на годината беше Унгарија, која не е дел од еврозоната, со 5,5 отсто пораст на потрошувачките цени во однос на истиот месец од претходната година.
На годишно ниво, потрошувачките цени најблаго пораснале во декември во Данска за 0,4 отсто и во Италија и Белгија за 0,5 отсто, се наведува во извештајот на Евростат.
