Увозот на нафта во Кина достигна рекордно ниво во 2023-та година во услови на закрепнување на побарувачката за гориво по пандемијата на коронавирус. Ова е јасно од податоците на царинските органи во земјата, цитирани од „Reuters“.
Според податоците на Министерството за транспорт, сообраќајот на кинеските автопати е зголемен за речиси 44% во однос на поминати километри во периодот јануари – ноември 2023-та година во однос на истиот период од претходната година. Брзо закрепнуваат и домашните летови – растот е од 27% на годишна основа до рекорд во декември. Во исто време, патувањето во странство е поограничено – летовите до меѓународните дестинации сè уште се 39% под нивото на предпандемијата во 2019-та година.
Минатата година во земјава се увезени речиси 564 милиони тони нафта или 11,28 милиони барели дневно. Претходниот рекорд беше забележан во 2020-та година – 10,81 милиони барели дневно во просек. Увозот се зголемува за 11 отсто во однос на 2022-ра година, додаваат од Царинската агенција.
Во декември е забележан значителен пораст на увозот – вкупно 48,3 милиони тони. Ова претставува 11,4 милиони барели дневно, што е повеќе од 10,3 милиони барели дневно во ноември.
Побарувачката на нафта во Кина се прогнозира да биде ограничена во првата половина на 2024-та година поради очекуваните проблеми со имотниот сектор, но дури и скромното зголемување на побарувачката за гориво ќе доведе до понатамошен раст на увозот.
Во 2023-та година, Кина, исто така, го зголеми увозот на природен гас, и цевководен и течен, за 10% до речиси 120 милиони тони. Во 2021-ва година увозот на гас достигна рекордни 121,4 милиони тони.
Извозот на нафтени деривати, вклучувајќи дизел, воздухопловно и поморско гориво и бензин, се зголеми за 16,7% на речиси 62,7 милиони тони.
