Ова е сезона на кашлање, кивање, течење на носот и болки во грлото, а во тие ситуации чајот од ловоров лист може да биде корисен поради одредени здравствени придобивки за сите оние кои не сакаат да пијат лекови.
Ловоровите листови (Laurus nobilis) содржат различни фитохемикалии и хранливи материи кои можат позитивно да влијаат на здравјето, а пиењето чај од ловоров лист е популарно како алтернативно решение за помали тегоби.
Зошто е добро да се пие
Традиционално се користи како помош за варење, чајот од ловоров лист може да помогне да се намали надуеноста. Некои истражувања сугерираат дека чајот од ловоров лист може да има антиинфламаторни ефекти, но може да помогне и во регулирање на нивото на шеќер во крвта.
Мирисот на ловоровите листови може да има смирувачки ефект и да ви помогне да се опуштите. Ловоровите листови имаат и антимикробни својства кои им помагаат во борбата против бактериите и габите. Секако важно е да се напомене дека чајот од ловор не треба да се консумира во преголеми количини.
Секако, се препорачува да се консултирате со лекар пред консумирање, особено ако имате некакви здравствени проблеми или земате одредени лекови. Инаку, препорачаната дневна доза е околу половина литар, или две шолји.
Во моментов сме особено заинтересирани за ловоровиот чај како помошно средство за ублажување на кашлица и болки во грлото бидејќи може да помогне при иритација и болки во грлото, па го баравме идеалниот рецепт.
Потребни ви се 5 суви ловорови листови (може да користите и свежи, само што потешко се наоѓаат во овој период од годината) и половина литар вода. Ловоровите листови искинете ги на ситни парчиња и ставете ги во тенџере, налејте ги со вода. Покријте и доведете до вриење, а потоа намалете ја топлината.
Оставете го чајот да се вари десет минути. Се трга од шпорет и се остава покриено уште десетина минути. Кога чајот малку ќе се олади, процедете го и додајте свежо исцеден сок од лимон и мед ако сакате – дефинитивно ќе го подобри вкусот.
