Турската лира достигна ново рекордно ниско ниво во однос на американскиот долар во четвртокот, тргувајќи се за 30,005 непосредно пред пладне по локално време.
Ова е првпат лирата да го пробие плафонот од 30 единици за долар. Американската валута е во пораст од 0,17% во однос на турската во однос на претходната дневна сесија.
Kреаторите на монетарната политика во земјата се борат против двоцифрената инфлација со постојано зголемување на каматните стапки, потсетува „CNBC“.
Овој поконвенционален пристап следи по неколкугодишната неортодоксна политика, за време на која Анкара одби да ги заостри каматните стапки и покрај големата инфлација, а турскиот претседател Реџеп Таип Ердоган редовно ги нарекуваше зголемувањата на стапките како „мајка на сите зла“.
Инфлацијата во земјата со околу 84 милиони жители се искачи на 64,8% на годишно ниво во декември од 62% во ноември, подобрување во однос на претходната година, откако достигна врв на 85,5% во октомври 2022-ра година.
Турската лира изгуби повеќе од 80% од својата вредност во однос на доларот во изминатите пет години, зголемувајќи ги трошоците за увоз и надворешниот долг и драстично слабеејќи ја куповната моќ на турските граѓани.
Нов финансиски тим беше назначен во централната банка на Турција во јуни минатата година, која зеде остар пресврт почнувајќи да ги зголемува каматните стапки под новиот гувернер Хафиз Гаје Еркан. Оттогаш, основната каматна стапка на земјата се зголеми од 8,5% на 42,5%.
