Бројот на корпоративни банкротства во Германија нагло се зголеми во 2023-та година, но ова можеби е само почеток, предупредува германски „Handelsblatt“.
Експертите очекуваат банкротите на компаниите да се зголемат за повеќе од 30 отсто во новата година, се вели во анализата нарачана од публикацијата на консултантската компанија „Falkensteg“.
Во 2023-та година, речиси 15.000 компании прогласија банкрот во најголемата европска економија, што е зголемување од 26 отсто во споредба со претходната година. Компаниите со промет од над 10 милиони евра се повеќе погодени од трендот, оценуваат експертите.
Со овие бројки, Германија е рангирана над глобалниот просек за банкроти на корпорации, според осигурителот на кредити „Allianz Trade“.
Трендот не се должи само на „заостанатиот ефект“ од периодот на пандемијата.
„Во 2024-та година, може да се соочиме со зголемување на банкротите од над 30 отсто“, предупредува Јонас Екхарт, партнер во „Falkensteg“.
Оваа прогноза е значително попесимистичка од онаа што ја подготвија другите експерти, а „Allianz Trade“ предвидува зголемување на банкротите за „само“ 10 проценти.
„Вистинскиот ефект од повеќекратните кризи во 2023-та година ќе влијае на бројот на случаи на банкрот само во новата година“, истакнува Екхарт.
Неповолниот тренд останува главно фокусиран на секторите на малопродажба, модата и здравството, како и недвижностите и градежништвото. Сепак, потешка ситуација може да се појави и во ресторанската индустрија, производството на машини и индустриска опрема.
