Германската инфлација порасна во декември поради базните ефекти, привремено прекинувајќи го трендот на намалување по неколку месеци и веројатно давајќи ѝ аргумент на Европската централна банка во корист на задржување на каматните стапки стабилни некое време.
Инфлацијата, приспособена во споредба со другите земји од Европската унија, порасна во декември на 3,8 отсто на годишна основа, објави Федералното биро за статистика. Тоа беше во согласност со очекувањата на аналитичарите, по 3,2 отсто во ноември, пренесува Ројтерс.
Аналитичарите на ИНГ банка оценуваат дека повторното забрзување на инфлацијата во Германија е причина ЕЦБ да ја зајакне својата позиција дека не брза со одлуките за намалување на каматните стапки, предвидувајќи дека нивното прво намалување ќе се случи во јуни.
Економистите посветуваат големо внимание на податоците за германската инфлација, бидејќи Германија обично ги објавува своите бројки еден ден пред објавувањето на податоците за инфлацијата во еврозоната.
Инфлацијата во еврозоната, чии податоци доспеваат на 5 јануари, се очекува да порасне на три отсто во декември од 2,4 отсто во ноември. Порастот на германската инфлација го одразува влијанието на мерките за енергетско олеснување за гас и централно греење минатиот декември, соопшти заводот за статистика.
Базичната инфлација, која ги исклучува нестабилните цени на храната и енергијата, падна на 3,5 отсто во декември од 3,8 отсто во ноември. Со оглед на тоа што базичната инфлација продолжува да опаѓа, тоа не треба да влијае на очекувањата на инвеститорите дека ЕЦБ ќе почне да ги намалува каматните стапки во наредните месеци, сметаат експертите на „Капитал економикс“.
