Со две минимални плати тешко се преживува во Македонија – синдикалната кошница изнесува 56.522 денари

Сојузот на синдикати на Македонија(ССМ) денеска ја претставија новата методологија на синдикалната минимална кошница, која ќе биде основa по којa синдикатите од 2024 година ќе се залагаат за зголемување на платите на работниците.

За основните потреби на семејство од двајца родители и две деца кои се ученици потребни се 56.522 денари, така пресметаа професорите Никола Поповски и Драган Тевдовски.

На презентацијата беше посочено дека овој износ е за оние семејства кои не се под кирија, а за семејствата кои плаќаат рента за стан, нивната синдикална кошница е поскапа за 21.324 денари.

Според пресметката, најмногу трошоци се издвојуваат за храна и пијалаци 20.700 денари или 36,7 отсто, а потоа се режиските трошоци со 10, 4 отсто или речиси вкупно половина од кошничката.