Цените на нафтата денеска паднаа под 79 долари на меѓународните пазари, бидејќи трговците се загрижени поради знаците за слабеење на побарувачката во САД.
На лондонскиот пазар по пладне цената на барелот со датуми на испорака во февруари беше пониска за 1,02 долари отколку на затворањето на тргувањето вчера и изнесуваше 78,63 долари. Вчера ја затвори трговијата со загуба од 1,42 долари.
Со барели за испорака во март денеска се тргуваше поактивно, по цена пониска за 92 центи, на 78,62 долари. На американскиот пазар барелот поевтини за 82 центи и се лизна на 73,29 долари. Вчера тој ја затвори трговијата со загуба од 1,46 долари. Трговците вчера беа загрижени од индициите за послаба побарувачка во САД, откако податоците од здружението на производители API покажаа дека залихите пораснале за 1,84 милиони барели минатата недела. Аналитичарите очекуваа остар пад во периодот пред Божиќните патувања.
Пазарот будно ги следи и тензиите во Црвеното Море. Голем број на носачи почнаа да ги пренасочуваат бродовите околу ртот Добра надеж поради честите напади на јеменските Хути, кои покажуваат поддршка за Палестинците во Појасот Газа со заглавување на бродови поврзани со Израел.
Рутата низ Црвеното Море е важна и за транспорт на нафта, но стравот од ризик го ублажи анализата на Ројтерс за распоредот на пловењето на данската бродска компанија „Маерск“, која покажа дека се подготвува да ги врати повеќето бродови на вообичаената рута.
Соединетите Американски Држави најавија меѓународна поморска коалиција која треба да ги заштити бродовите преку Црвеното Море, но многу сојузници се двоумат или најавуваат повлекување, откривајќи поделби околу војната на Израел во Газа и американската поддршка за Тел Авив.
Началникот на израелскиот воен штаб, Херзи Халеви, им рече на новинарите оваа недела дека војната ќе трае со „месеци“.
