Европската унија (ЕУ) и Велика Британија одобрија тригодишно одложување на тарифите за електричните возила, давајќи им на производителите на автомобили повеќе време да ги направат потребните промени за да се усогласат со барањата за локална содржина според билатералниот трговски договор.
Мерките, кои треба да стапат на сила од почетокот на следната година, предвидуваат царина од 10% за електричните автомобили со кои се тргува меѓу ЕУ и Британија доколку помалку од 45% од нивната вредност потекнува од регионот – политика која е дизајнирана да ја зајакне европската синџирот на снабдување за индустријата.
Марош Шефчович, потпретседател на Европската комисија задолжен за Брегзит, го опиша договорот како „балансирано решение што ги штити интересите на ЕУ“, додека британскиот премиер Риши Сунак рече дека тоа ќе биде „огромно олеснување за индустријата“.
Автомобилската индустрија, како и Велика Британија и голем број земји-членки на ЕУ, повикаа на одложување на мерката, велејќи дека снабдувањето со батерии моментално доцни.
Тригодишниот грејс период е наменет да и даде на индустријата доволно време да го прошири производството на батерии во регионот.
Трговските здруженија од двете страни ја поздравија одлуката, истакнувајќи дека таканаречените тарифи за „правила за потекло“ нема да стапат на сила до почетокот на 2027-ма година.
И ЕУ и Велика Британија ветија дека ќе обезбедат средства за поддршка на проширувањето на производството на батерии. ЕК ќе обезбеди 3 милијарди евра средства од Фондот за иновации. Од Лондон посочуваат дека владата ќе обезбеди повеќе од 2 милијарди фунти за поддршка на производството на електрични автомобили и батерии.
Одложувањето на давачките е еднократна акција која не може да се продолжи, нагласуваат од ЕУ. Одлуката стапува во сила веднаш.
