Германија ќе продаде помалку федерален долг следната година бидејќи владата продолжува да ја намалува помошта за да го неутрализира влијанието на пандемијата и енергетската криза.
Владата планира да издаде долг во вредност од околу 440 милијарди евра, се вели во соопштението објавено во вторник од федералната финансиска агенција. За споредба, оваа година е издаден долг во вредност од рекордни 500 милијарди евра, пишува „Bloomberg“.
Планот предвидува продажба на обврзници во вредност од 248 милијарди евра и 165 милијарди евра државни записи, како и меѓу 17 и 19 милијарди евра зелени обврзници, соопшти агенцијата.
Приносот на 10-годишните германски обврзници падна за околу пет базични поени на 2,03% по објавувањето на веста. Ова ниво е блиску до најниското забележано во март.
Задолжувањето на германската федерална влада се зголеми во 2020-та година поради пандемијата. Во тоа време, земјата, исто така, се откажа од должничката сопирачка што е предвидена во уставот за да ги покрие трошоците за справување со последиците од пандемијата и да го олесни товарот од порастот на цените на енергијата поради војната во Украина.
Откако тие кризи стивнаа, министерот за финансии Кристијан Линднер, кој претседава со фискалните јастреби на Слободните демократи, првично се заложи за германската трипартиска коалиција да го врати уставното ограничување за ново задолжување уште оваа година.
Германскиот уставен суд во меѓувреме ја ограничи употребата на вонбуџетски средства, со што се промени буџетското планирање на владата. Затоа Линднер беше принуден да прифати суспендирана сопирачка за долгот четврта година по ред.
