Цените на нафтата во понеделникот продолжија да паѓаат на меѓународните пазари, а цената на барелот на лондонскиот пазар падна за 45 центи во однос на претходното затворање, на 78,43 долари, додека барелот на американскиот пазар се тргува по пониска цена од 43 центи од 73,64 долари.
Падот на цените во понеделник се надоврзува на минатонеделниот пад од 2 отсто, по намалувањето на понудата објавено во четвртокот од страна на Организацијата на земјите извознички на нафта (ОПЕК) и нејзините сојузници, вклучително и Русија, колективно познати како ОПЕК+ група.
Кратењата на ОПЕК+ се доброволни по природа и предизвикуваат сомнежи дали производителите целосно ќе ги спроведат или не. Дури и инвеститорите не беа сигурни како тоа ќе изгледа.
Забавувањето на глобалната производна активност исто така влијаеше на цените.
Новите податоци укажуваат на силни економски тешкотии кои ја зголемуваат загриженоста за растот на побарувачката на нафта.
Геополитичките размислувања се повторно во фокусот по обновувањето на борбите во Газа. Три комерцијални бродови биле нападнати во меѓународни води во јужниот дел на Црвеното Море, објави во неделата американската војска.
На другиот дел од светот, западните земји ги засилуваат напорите за спроведување на ограничувањето на цената од 60 долари за барел на поморските пратки на руска нафта, наметната за да се казни Москва поради војната во Украина.
Одделно, ОПЕК објави дека барел нафтена кошница на нејзините членки во петокот паднал за 2,41 долари на 82,59 долари.
