Италијанската економија сепак забележа одреден раст во третиот квартал наместо стагнацијата што првично ја процени националниот институт за статистика на земјата, пишува „Bloomberg“.
Бруто домашниот производ (БДП) на Италија се зголеми за 0,1% во трите месеци до крајот на септември, при што потрошувачките трошоци и извозот го поддржуваат проширувањето.
Резултатот делумно ќе ја компензира изненадувачката ревизија објавена во четвртокот во Франција, чија економија неочекувано се намали во истиот период. Тоа би можело да помогне да се избегне надолна проценка за БДП-то на еврозоната кога новите податоци ќе бидат објавени следната недела. Претходно се сметаше дека економијата во регионот паднала за 0,1%.
Вестите за економскиот раст на Италија ќе му дадат уште еден поттик на премиерката Џорџа Мелони откако „Moody’s Investors Service“ одби да го намали рејтингот на земјата, а Европската комисија (ЕК) се воздржа од отворено критикување на полабавата фискална позиција на владата.
Според централната банка на земјата, ризиците за финансиската стабилност остануваат значајни, но се намалени благодарение на посилниот банкарски систем. Агенцијата додаде дека кабинетот на Мелони треба да се фокусира на фискалната претпазливост и реформите насочени кон промовирање на растот.
Според последните прогнози на централната банка, владата се бори со економијата која се очекува да порасне за само 0,7% оваа година и долгот да достигне 140% од бруто домашниот производ (БДП). А сепак, премиерот мора да ги финансира ветувањата за гласачите, вклучително и намалување на даноците и помош за домаќинствата со пониски приходи, а истовремено да продолжи да го намалува дефицитот на земјата во согласност со правилата на Европската унија (ЕУ).
Кон крајот на ноември, Мелони одобри план од 27,4 милијарди евра за промовирање зелени инвестиции и олеснување на трошоците за енергија за индустрискиот сектор.
„Сакаме да ги поддржиме домаќинствата и бизнисите за да ги направиме протагонисти на урамнотежена и реална транзиција“, рече министерот за транзиција на животната средина Жилберто Пичето Фратин.
