Глобалната трговија со стоки постепено закрепнува во втората половина на 2023 година, благодарение на подобрата продажба и производство на автомобили и електронски компоненти, во услови на голема неизвесност, соопшти Светската трговска организација (СТО).
Барометарот на СТО за тргување со стока, мерило за трговските трендови во реално време, ја надмина основната вредност од 100, достигнувајќи 100,7 во септември, од 99,1 во август, јавува Anadolu Agency.
„Ова сугерира дека обемот на трговијата со стоки постепено ќе се врати на нивниот среднорочен тренд во втората половина на 2023 година, иако неизвесноста останува висока поради мешаните економски податоци и зголемените геополитички тензии“, се вели во извештајот на СТО.
Обемот на светската трговија со стоки е зголемен за 0,2 отсто во однос на претходниот период во вториот квартал од 2023 година, но и натаму е помал за 0,5 отсто на годишна основа.
Бројката во третиот квартал се очекува да биде малку посилна благодарение на побрзиот раст на БДП во САД и Кина, иако економијата на Европската унија стагнира.
Годишниот раст на трговијата најверојатно ќе биде силен во четвртиот квартал поради базниот ефект, бидејќи високите цени на енергијата, зголемувањето на каматните стапки и нарушувањата поврзани со пандемијата влијаеа врз економскиот раст во водечките економии во истиот период минатата година.
