2 март, 2024
ПочетнаЕКОНОМИЈАГо садиш, го береш, го нижеш, го сушиш, а го продаваш за...

Го садиш, го береш, го нижеш, го сушиш, а го продаваш за џабе – ќе го слушне ли државата крикот на тутунарите?

Само што не започнал откупот на тутунот, но земјоделците не се задоволни со понудената цена од 360 денари за килограм.

Тие велат дека тоа е премногу малку за да се покријат трошоците за производство, кои се проценуваат на околу 250 денари за килограм.

Еден од нив е и 34-годишниот тутунар од Прилеп, кој сакаше да остане анонимен.

Тој вели дека секоја година заработува од 7.000 до 10.000 евра само од продажбата на тутунот, но за оваа година вели дека ќе биде задоволен ако добие 5.000 евра.

„Годинава се соочивме со голема суша, па и квалитетот на производот не е највисок. Ние треба да го продадеме тутунот за да можеме да живееме, но не сме среќни со цената. Ние бараме барем 600 денари за килограм, што е под минималната цена во Европа”, вели тој.

Еден од тутунарите од Крушевско, кој исто така сака да остане анонимен, вели дека продажбата на тутунот е нивното единствено средство за преживување.

Тој вели дека нема други алтернативи за земјоделство во неговиот регион, и дека тутунот е традиционален производ.

„Ние сме тутунари од дедо на внук. Ние не знаеме за друго. Откупот на тутунот е нашата годишна плата. Ако не добиеме добра цена, нема да можеме да преживееме. Ние бараме од државата да не нè заборави и да не нè остави на милост и немилост на откупувачите”, вели тој.

И додека тутунарите бараат задолжително покачување на откупните цени со нови анекси на веќе потпишаните договори, од Министерството за земјоделство, шумарство и водостопанство (МЗШВ) ниту збор за ова нивно барање.

„Како и секоја година пред стартот на откупот со откупувачите се разговараше за престојната реколта. Заеднички беше констатирано дека и оваа година квалитетот на тутунот е добар и дека ќе имаме успешен откуп. Откупните пунктови се подготвени, а кај откупувачите има подготвеност за директни разговори со Сојузот на тутунари, и во наредните денови, заедно преку дијалог треба да ја утврдат динамиката на откуп“, се вели во кусото писмено соопштение на МЗШВ.

Но, за бараната корекција на цените, ниту збор.

Од Сојузот на земјоделски здруженија се заканија дека доколку не се постигне договор со откупувачите за извесно зголемување на откупните цени, тие нема да дозволат откупот да започне, односно нема да ги пуштат поверениците на вагите.

Од новоформираната Национална земјоделска мрежа, пак, потенцираат дека будно ги следеле случувањата и не ја исклучуваат можноста повторно да има протести ако откупната цена не достигне 10 евра за килограм тутун.

Официјалниот откуп на тутунот треба да започне на 15 декември, а ќе откупуваат 10 откупни компании.

Б.З.М.

НАЈНОВИ ВЕСТИ

ХОРОСКОП