Ограничувањето на цената на руската нафта што го наметнаа западните земји речиси целосно се заобиколува, рекоа западните власти и тие земји „мора да најдат нови начини“ да ги задржат санкциите против Москва, пишува Фајненшл тајмс.
Висок европски функционер рече дека цената на „речиси ниту една“ руска нафта во октомври не била под границата од 60 долари за барел што ја поставија земјите од Г7.
„Последните податоци покажуваат дека ќе треба да ги заостриме мерките. Апсолутно нема никаков апетит да и се дозволи на Русија да го продолжи ова“, рече тој.
Претставниците на ЕУ во последните денови разговараа за зајакнување на ограничувањата, вклучувајќи ја и можноста за зајакнување на спроведувањето или ограничување на пристапот на Русија до танкери за нафта.
Загриженоста на западните претставници беше поткрепена со официјалната руска статистика за продажбата на нафта во октомври, бидејќи Москва соопшти дека просечната цена на продадената нафта е над 80 долари за барел, пишува ФТ.
Порастот на цената на руската нафта им нанесе удар на напорите на Г7 да го ограничи протокот на средства што Кремљ ги користи за финансирање на својата операција во Украина и доаѓа во време кога Киев постигна само „ограничен напредок“ во својата офанзива, пишува британскиот весник.
Земјите-членки на Г7 и Австралија во декември минатата година воведоа плафон на цената на руската нафта од 60 долари за барел, заканувајќи се дека ќе ѝ го забранат пристапот на Москва до нејзините услуги како што се транспортот и осигурувањето.
Сепак, Русија се покажа како вешта во заобиколувањето на ова ограничување, развивајќи ја својата „флота во сенка“.
Цената на руската нафта се искачи над 60 долари за барел во текот на летото, кога Русија и Саудиска Арабија ги здружија силите за да го намалат производството преку договори во рамките на картелот ОПЕК +.
Кон крајот на септември, ФТ објави дека во август речиси три четвртини од сите пратки на руска сурова нафта на море патувале без западно осигурување, што е знак дека се повеќе ги заобиколува западните ограничувања.
Европските власти се загрижени дека некои западни осигурителни компании добиле „лажни изјави“ од руски нафтени компании или трговци, кои мора да дадат писмени гаранции дека цената на нафтата е под 60 долари. Еден механизам со кој тоа беше постигнато во минатото е со зголемување на трошоците за испорака.
Западните функционери велат дека се држат до ограничената цена, иако признаваат дека таа воопшто не се почитува.
